Avsnitt
-
Ásgeir er skotíþróttamaður sem sérhæfir sig í loftskammbyssu og frískammbyssu. Ásgeir á langan og farsælan feril að baki en hann byrjaði að keppa fyrir Íslands hönd á alþjóðlegum unglingamótum þegar hann var 16 ára og nú, 20 árum síðar er hann á leið á sína aðra Ólympíuleika. Hann á Íslandsmetin í öllum sínum greinum og hefur keppt og komist í úrslit á öllum stærstu mótum í Evrópu, s.s. á Evrópumeistaramótum, Evrópuleikum og einnig á heimsbikarmótum.
Í viðtalinu talar Ásgeir um skotíþróttina og lífið í tengslum við íþróttina og utan hennar.
-
Guðbjörg Jóna Bjarnadóttir er Íslandsmethafi í 100m, 200m og 60m hlaupi og hefur verið lykilmanneskja í landsliði Íslands um árabil þrátt fyrir ungan aldur. Guðbjörg Jóna er Ólympíumeistari ungmenna í 200m hlaupi, en þeim merka áfanga náði hún árið 2018 í Argentínu og er hún eini Íslendingurinn sem á gull frá Ólympíuleikum ungmenna. Guðbjörg Jóna varð einnig Evrópumeistari U18 í 100m hlaupi og náði 3. sæti á sama móti í 200m hlaupi. Hún hefur einnig unnið þónokkur verðlaun á Norðulandameistaramótum U20 og hefur verið lykilmanneskja í landsliði Íslands í mörg ár þrátt fyrir ungan aldur. Guðbjörg Jóna stundar nám í sálfræði við Háskólann í Reykjavík samhliða því að æfa og keppa af fullu kappi.
Í viðtalinu sem er tekið af Kristínu Birnu Ólafsdóttur talar Guðbjörg um æfingar, keppnir, lífið og ýmsar áskoranir sem fylgja því að æfa og keppa á alþjóðavettvangi. -
Saknas det avsnitt?
-
Valgarð er margfaldur Íslandsmeistari í fimleikum og lykilmaður í landsliði Íslands undanfarin ár. Hann hefur keppt með góðum árangri á alþjóðlegum mótum eins og Evrópu- og heimsmeistaramótum, Norðurlandamótum og Smáþjóðaleikum. Valgarð stefnir á að komast á Ólympíuleikana í Tókýó 2020 og er á fullu að undirbúa sig fyrir það ásamt því að stunda nám við Háskólann í Reykjavík.
Í viðtalinu sem er tekið af Kristínu Birnu Ólafsdóttur talar Valarð um fimleikana, æfingar og keppnir hérlendis og erlendis sem og ýmsar áskoranir sem fylgja því að æfa og keppa á alþjóðavettvangi.
-
Í viðtalinu, sem tekið er af Rögnu Ingólfsdóttur, talar Ólafía Þórunn um sinn íþróttaferil, allt frá sínum fyrstu skrefum í golfíþróttinni til þess að vera orðin atvinnukona í golfi.
Viðtalið má sjá hér á Youtube-síðu ÍSÍ.
-
Karen Knútsdóttir er landsliðskona í handknattleik og leikstjórnandi með meistaraflokki kvenna í Fram. Hún hefur náð frábærum árangri með liðinu og liðið hefur nokkrum sinnum orðið Íslands- og bikarmeistari. Karen var erlendis í atvinnumennsku um árabil og spilaði með þrem mismunandi liðum; Nice í Frakklandi, SönderjyskE í DK og Blomberg/Lippe í Þýskalandi. Karen hefur verið einn lykilleikmaður íslenska landsliðsins í yfir áratug og spilað með liðinu á þrem stórmótum.
Karen eignaðist nýlega barn en stefnir ótrauð á að snúa aftur til keppni fljótlega.
Í viðtalinu, sem er tekið af Kristínu Birnu Ólafsdóttur, talar Karen um ferilinn, æfingar hérlendis sem og erlendis og ýmislegt annað skemmtilegt.
-
Guðni Valur Guðnason, Ólympíufari, margfaldur Íslandsmeistari og Íslandsmethafi í kringlukasti er fimmti gestur Verum hraust – Hlaðvarps ÍSÍ.
Guðni Valur setti Íslandsmet á árinu 2020 er hann kastaði kringlunni 69,35 m., en það er einnig fimmta lengsta kast ársins í heiminum á árinu.
Guðni Valur hefur keppt á Evrópu- og heimsmeistaramótum sem og Smáþjóðaleikum fyrir Íslands hönd frá árinu 2015. Hann sigraði kringlukastskeppnina á Smáþjóðaleikunum árin 2015 með kast upp á 56,40 m og 2017 með kast upp á 59,98 m og náði 2. sætinu árið 2019. Guðni Valur keppti á EM árið 2018 og var einungis 83 cm frá því að komast í úrslit. Guðni átti þá stigahæsta afrek Íslendings ársins samkvæmt stigatöflu Alþjóðafrjálsíþróttasambandsins (IAAF).
Í viðtalinu, sem tekið er af Kristínu Birnu Ólafsdóttur, talar Guðni um ferilinn, æfingar, lífið, áskoranir og markmið komandi ára.
Viðtalið má sjá hér á Youtube-síðu ÍSÍ.
-
Júlían J. K. Jóhannsson, Íþróttamaður ársins 2019 og stigahæsti kraftlyftingamaður á Íslandi frá upphafi, er fjórði gestur Verum hraust – Hlaðvarps ÍSÍ.
Júlían hefur náð glæsilegum árangri í kraftlyftingum síðastliðin ár. Á árinu 2019 setti Júlían heimsmet í réttstöðulyftu á heimsmeistaramótinu í kraftlyftingum, er hann lyfti 405,5 kg. Hann bætti eigið heimsmet um hálft kíló og hreppti auk þess bronsverðlaunin í samanlögðum greinum á mótinu. Hann náði 2. sæti á Evrópumeistaramótinu og var einnig kjörinn Íþróttamaður ársins 2019.
Á árinu 2018 setti Júlían heimsmet, Evrópumet og náði 3. sæti á HM í samanlögðum greinum.
Júlían er í miklu stuði þessa dagana og segist hvergi nærri hættur, enda eigi hann svo sannarlega eftir að toppa.
Í viðtalinu, sem tekið er af Rögnu Ingólfsdóttur, talar Júlían um markmiðasetningu, erfiða æfingaaðstöðu á tímum Covid, fjölskyldu sína, drauma sína og fleira.
Viðtalið má sjá hér á Youtube-síðu ÍSÍ.
-
Brynjar Gunnarsson, afreksþjálfari í frjálsíþróttum, hefur staðið sig frábærlega í þjálfarastarfinu á undanförnum árum þrátt fyrir ungan aldur og erfiðan sjúkdóm sem hefur tekið sinn toll.
Brynjar hefur verið þjálfari í yfir áratug og séð um umsjónaþjálfun yngri flokka hjá Íþróttafélagi Reykjavíkur um árabil. Undanfarin ár hefur hann einnig fært sig yfir í afreksþjálfun en hann þjálfar m.a. íþróttafólk eins og Guðbjörgu Jónu Bjarnadóttur, Ólympíumeistara ungmenna og Evrópumeistara ungmenna í spretthlaupum, Tíönu Ósk Whitworth og Jóhann Björn Sigurbjörnsson sem bæði eru meðal bestu spretthlaupara landsins, ásamt mörgu öðru flottu íþróttafólki.Í viðtalinu, sem er tekið af Kristínu Birnu Ólafsdóttur, talar Brynjar um þjálfarastarfið, lífið, ferilinn og sjúkdóminn.
Viðtalið má sjá hér á Youtube-síðu ÍSÍ.
-
Guðlaug Edda Hannesdóttir, þríþrautarkona og Íslandsmethafi, stefnir ótrauð á Ólympíuleikana í Tókýó 2021. Guðlaug Edda er annar gestur Verum hraust - Hlaðvarps ÍSÍ.
Eftir þrjú ár í Danmörku þar sem Guðlaug Edda æfði þríþraut með danska landsliðinu ákvað hún að flytja heim til Íslands og æfir hún nú undir leiðsögn Ian O'Brien. Hún hefur keppt í flokki atvinnumanna í heimsbikarkeppni Alþjóðaþríþrautarsambandins frá árinu 2016, hefur einnig keppt í stigakeppnum á vegum Evrópska þríþrautarsambandsins auk þess að keppa í atvinnumannadeildinni í Þýskalandi og Frakklandi.
Í viðtalinu, sem tekið er af Rögnu Ingólfsdóttur, talar Guðlaug Edda um daglegt skipulag afreksíþróttakonu, hugarástand sitt þegar að þreytan sækir á í keppnum, hvernig hún tæklaði það þegar að hún gat ekki synt í sundlaug vegna takmarkana á íþróttastarfi og fleira.
Viðtalið má sjá hér á Youtube-síðu ÍSÍ.
-
Anton Sveinn McKee, margverðlaunaður sundmaður og Íslandsmethafi, er í besta formi lífs síns um þessar mundir og er fyrsti gestur Verum hraust - Hlaðvarps ÍSÍ. Hann er tvöfaldur Ólympíufari og stefnir á sína þriðju Ólympíuleika í Tókýó 2021, en hann er jafnframt eini Íslendingurinn sem náð hefur lágmarki á þá leika. Anton Sveinn er atvinnumaður í sundi, en hann keppir fyrir kanadíska félagið Toronto Titans. Stuttu fyrir viðtalið í nóvember 2020 setti Anton fjögur Íslandsmet og tvö Norðurlandamet þegar að hann keppti á International Swimming League mótaröðinni í Búdapest fyrir Toronto Titans.
Í viðtalinu, sem tekið er af Rögnu Ingólfsdóttur verkefnastjóra kynningarmála hjá ÍSÍ, talar Anton um markmiðasetningu, réttindi íþróttafólks, daglegar æfingar sínar, af hverju hann hætti tímabundið á samfélagsmiðlum og fleira.
Viðtalið má sjá á Youtube.